Us Ki Aankhon Mein Muhababt Ka Sitara Ho Ga

Us Ki Aankhon Mein Muhabbat Ka Sitara Ho Ga,

Ek Din Aye Ga Woh Shakhs Hamara Ho Ga,

 

Tum Jahan Mere Liye Seepiyan Chunti Ho Gi,

Woh Kisi Aur Ki Duniya Ka Kinara Ho Ga,

 

Zindagi Ab Mera Naam Na Shamil Karna,

Agar Yeh Teh Hai Yehi Khel Dobara Ho Ga,

 

Jis K Hone Se Meri Saans Chala Karti Hai,

Kis Tarah Us K Bina Mera Guzara Ho Ga,

 

Yeh Achanak Jo Ujala Sa Hua Jata Hai,

Dil Ne Chupke Se Tera Naam Pukara Ho Ga,

 

Ishq Karna Hai To Din Raat Usey Sochna Hai,

Aur Kuch Zehan Mein Aya To Hasara Ho Ga,

 

Yeh Jo Paani Mein Chala Aaya Sunehri Sa Gharoor,

Us Ne Darya Mein Kahin Paon Utara Ho Ga,

 

Kon Rota Hai Yahan Hijar K Sannaton Mein,

Mere Jaisa Koi Hijar Ka Mara Ho Ga,

 

Mujh Ko Maloom Hai Joon Hi Main Qadam Rakhun Ga,

Zindagi Tera Koi Aur Kinara Ho Ga,

 

Jo Meri Rooh Mein Badal Se Garajte Hain Wasi,

Us Ne Seene Mein Koi Dard Utara Ho Ga,

 

Kaam Mushkil Hai Magar Jeet Hi Loon Ga Us Ko,

Mere Maula Ka Wasi Jab Ishara Ho Ga...